بسم الله الرحمن الرحيم
الى كل مخطوبه مخنوقه تعالى عندنا منك كتير
السلام عليكم ورحمه الله وبركاته
اهلا بكم فى معركه اى اتنين مخطوبين
وانا اولهم طبعا
هو: حبيبتى
هى: حبيبي
هو: بموت فيكى
هى: انا اكتر ياحبيبي
ده كله فى الاول طبعا
نيجي بقي للفتره المقصوده من الموضوع اساسا
هي: حبيبي انا نازله خارجه مع صاحبتى
هو: لا
هى: انا رايحه عند تيته
هو: لا
هى: انا عندى فرح
هو: لا
هى:انا عايزه اششنغل
هو: لا
هى:انا حسافر انا واختى لاى بلد بقي نشتري شويه حاجات
هو: لا
هى: حبيبي انا حروح عند جارتي شويه
هو: لا
هى:طيب ايه رأيك نخرج انا وانت واخوتك
هو: اه
هى : طيب اخرج انا واختك
هو: اه
هى: طيب خطيب اختى عندنا فى البيت
هو: حسك عينك تتطلعى من الاوضه
هى: ازاى بس ياحبيبي
هو: خلاص ادخلى سلمى واطلعى علطول لكن ضحك وهزار ممنوع
هى: طيب مانت ياحبيبي كنت بتهزر مع اخواتى
هو: مليش فيه
هى: حنروح نزور قرايبي
هو: عندهم صبيان
هى: اه
هو: الموضوع مرفوض
هى: طيب ماهم ولاد عمى
هو: مليش فيه
وهكذا دواليك دواليك واكثر من ذلك مع معظم البنات الخطوبات
الموضوع بقي اللى عندى متفرع لحاجتين
ليه هما بيعملوا كده
تانى حاجه ايه رأى البنات ومين خطيبها كده
ومين اتخنقت ومين فكت ومين كرهته بعد ماكنت بتحبه
الطبيعى والاكيد انهما بيعملوا كده من اللى بيشفوه
يعنى مثلا لما واحده متجوزه وتكلم واحد غير جوزها
طيب ماطبيعى انه دماغه تاكله وتلف وتدور
ولما واحده تبقي مخطوبه وتكلم جنب خاطيبها خمسين او انشالله واحد
شعورنا ايه بقي احنا يابنات
مبدئيا انا بطلب من كل البنات اللى زيي كده انها تشارك فى الموضوع
وطبعا نصائح الكبار واصحاب التجارب حتفيدنا وتظبط دماغنا كلنا
بصوا يابنات انا اتطبعت بطبع خطيبي وخلاص بقيت مابخرجش وقاعده فى البيت ومااشتغلتش ومش بروح عند حد ومابزورش حد
ساعات كتير جدا بتخنق وبمل وبقول ياربي وانا عليا بكده بأيه
واجرى اشتكى لواحده ممكن تكون مش مخطوبه او خطيبها كويس معاها شويه
فبتسخنى وتخلينى اشوف ان الدنيا وردي وان فى ناس احسن من خطيبي
واقفل الاقى واحده بتكلمنى وتشتكيلى من نفس مشكلتى
فتهدينى
ولقيت هنا معظم المشاكل كده
فأمنت ان الشباب هما اللى بقوا كده
انا عايزه نفتح مناقشه وحوار وارجو الموضوع يتقيم
عشان نفيد ونستفيد من بعض
ونداء لكل بنت مخطوبه اوعى تتخنقى من خطيبك لو بيعمل كده صدقونى من اللى بيشوفه ومحدش يفكر انها بس لوحدها اللى كده لا فى غيرها كتير ياترى مين زيي ومين كان حيتخنق ويسيب وموضعى خلاه يفكر شويه
ومين اتعود على كده وبدأ يعود نفسه
يالا ياجماعه عايزين نسخن ونساعد البنات المخطوبه انها تتبسط شويه وتعرف انها مش لوحدها والمتجوزين برضه
سلامى للجميع